सर्लाही– सर्लाहीको बागमती नगरपालिका–१२ स्थित कर्मैया चेकपोस्टमा प्रहरीले झन्डै ५९ लाख रुपैयाँ बराबरको शंकास्पद सामान बरामद गरेको छ।

मंगलबार बिहान ११:१५ बजे इलाका प्रहरी कार्यालय कर्मैया सर्लाहीबाट सई सुभाष यादवको नेतृत्वमा खटिएको प्रहरी टोलीले बिरगंजबाट सिराहातर्फ जाँदै गरेको ना ४ ख २४७१ नम्बरको ट्रक रोकेर चेकजाँच गर्दा सामान बरामद गरिएको हो।

चेकजाँचका क्रममा ट्रकमा लोड गरिएको औषधि, काजु, टेप, मोबिल, धनियाँ, बेसार, स्पेयर पाट्र्सलगायत विभिन्न प्रकारका खुद्रा सामानको बिल–बिजक शंकास्पद पाइएपछि ट्रकसहित सामान नियन्त्रणमा लिइएको प्रहरीले जनाएको छ।

प्रहरीका अनुसार, नियन्त्रणमा लिइएको सामानको अनुमानित मूल्य करिब ५८ लाख ९१ हजार ८७४ रुपैयाँ रहेको छ। बरामद गरिएको ट्रक र सामानलाई थप अनुसन्धान र आवश्यक कारबाहीका लागि राजश्व अनुसन्धान कार्यालय पथलैया, बारा पठाइएको छ।