महोत्तरी — सरकारले प्रतिक्विन्टल ७० रुपैयाँको उखु अनुदान कटौती गरेको विरोधमा महोत्तरीका किसानले मंगलबार गौशालास्थित एभरेस्ट सुगर एन्ड केमिकल इन्डस्ट्रिज अगाडि टायर बालेर प्रदर्शन गरेका छन्।
उखु उत्पादक कृषक महासंघ महोत्तरीका अध्यक्ष नरेश सिंह कुशवाहाले अनुदान कटौती किसानमाथि अन्याय भएको भन्दै भदौ ६ भित्र माग सम्बोधन नभए ८ भदौदेखि काठमाडौंमा धर्ना बस्ने चेतावनी दिए।
महासंघका केन्द्रीय सदस्य महाशंकर थिङका अनुसार मंगलबार चिनी उद्योग भएका विभिन्न जिल्लामा पनि किसानहरुले सांकेतिक आन्दोलन थालेका छन्। कार्यक्रममा लोसपाका नेता देवनारायण महतोले सरकारले किसानलाई राहत दिनुको सट्टा अनुदान कटौती गर्नु लज्जास्पद भएको बताए।
