लव कुमार ठाकुर, गौशाला । महोत्तरीको गौशाला नगरपालिकामा बडा दशैंको अवसरमा आयोजना हुने दुर्गा पूजा तथा मेलालाई सफल बनाउन व्यवस्थापन समिति गठन गरिएको छ ।

गौशाला नगरपालिका–५, गौशाला बजारमा अवस्थित ऐतिहासिक दुर्गा मन्दिरमा प्रत्येक वर्षझैं यस वर्ष पनि भव्य रुपमा दुर्गा पूजा तथा मेला आयोजना हुने भएको छ । आइतबार मन्दिर प्राङ्गणमा सम्पन्न भेलाले मेलाको तयारी तथा सञ्चालनका लागि समिति गठन गरेको हो ।

वडा नम्बर ५ का वडा अध्यक्ष ओम प्रकाश गुप्ताको अध्यक्षतामा गठन गरिएको समितिको अध्यक्षमा उपेन्द्र शाह हलवाई, उपाध्यक्षमा राजा बाबु शाह, कोषाध्यक्षमा रविन्द्र कुमार शाह, र सचिवमा हेमन्त कुमार सिंह चयन भएका छन् । त्यसैगरी सदस्यहरुमा सुनिल कुमार मण्डल, रन्जित थापा, साजिस रजक र प्रशान्त कुमार शाह रहेका छन् ।

समितिको सल्लाहकारमा पूर्व वडा अध्यक्ष धर्मेन्द्र साह कलवार, अर्जुन मण्डल, कमल पासवान, ओम प्रकाश गुप्ता, जय नारायण शाह, मदन प्रसाद गुप्ता र मनोज शाह कलवारलाई समावेश गरिएको छ ।

स्थानीय धार्मिक, सांस्कृतिक तथा सामाजिक महत्व बोकेको यस दुर्गा मन्दिरमा दशैंको अवसरमा प्रत्येक वर्ष हजारौँ श्रद्धालुहरूको उपस्थितिसहित भव्य मेला लाग्ने परम्परा रहेको छ ।