मलंगवा – सर्लाहीमा सर्पले डसेका एक पुरुष सर्पसहित उपचारका लागि अस्पताल पुगेका छन्।
विष्णु गाउँपालिका–६ का ४० वर्षीय रामइश्वर रायलाई शनिबार दिउँसो गोमन सर्पले डसेको थियो। डसाइँसँगै उनले सर्पलाई समाते र प्रादेशिक अस्पताल मलंगवामा उपचारका लागि पुगे।
अस्पतालका स्वास्थ्यकर्मीका अनुसार बिरामीसँगै सर्प पनि ल्याएर अस्पतालमा प्रवेश गरेको घटना पहिलोपटक भएको हो, जसले अस्पताल परिसरमा केहीबेर हंगामा र भीड आकर्षित गर्यो।
चिकित्सकहरूले रायलाई गोमन सर्पले टोके पनि विष नपसेको पुष्टि गरेका छन्। उनलाई सामान्य उपचार गरी पाँच घण्टा निगरानीमा राखिएको र अवस्था सामान्य भएपछि साँझ डिस्चार्ज गरिएको अस्पतालले जनाएको छ।
रायलाई गाउँमै सर्प समाउने क्रममा डसेको र उपचारपछि पनि उनी सर्प बोकेरै घर फर्किएको अस्पताल प्रशासनले जनाएको छ।
