धनुषा जिल्लाको बटेश्वर गाउँपालिका–१ बडहरी खोला नजिकको खेतमा क्रसरले खनेको गहिरो खाल्डोमा आज एक दुःखद घटना घटेको छ। उक्त खाल्डोमा जमेको पानीमा डुबेर १४ वर्षीय अविनाश कुमार ,रामशोगारथको छोराको अकाल मृत्यु भएको हो। उनी नुहाउन जाने क्रममा डुबेका थिए भन्ने जानकारी स्थानीयहरूले दिएका छन्।

घटनास्थलमा पुगेका स्थानीय बासिन्दाहरूले खाल्डो अत्यन्तै गहिरो भएको र त्यसमा बाढीको पानी जमेकाले जोखिम बढेको बताएका छन्। उनीहरूको अनुसार, क्रसर सञ्चालनका क्रममा खनिएका खाल्डाहरू वर्षा पछि पानीले भरिँदा यस किसिमका दुर्घटना बारम्बार भइरहेका छन्।

यस्तै, करिब दुई वर्ष अघि पनि विगही खोलामा क्रसरले खनेको खाल्डोमा डुबेर स्थानीय विनोद महतोका छोरा ज्यान गुमाएका थिए। लगातार हुने यस्ता घटनाले स्थानीयवासीले क्रसरमाथि कडा निगरानी र उचित नियन्त्रणका लागि सम्बन्धित निकायलाई आग्रह गरेका छन्।