महोत्तरी। बर्दिवास नगरपालिका-१० खयरमारामा असोज १७ गते भएको सवारी दुर्घटनामा घाइतेहरूको उपचार खर्च बीपी यातायातले व्यहोर्न अस्वीकार गरेपछि पीडित पक्षले आइतवार बिहानदेखि पूर्व–पश्चिम राजमार्ग अवरुद्ध गरेका थिए।
इलाका प्रहरी कार्यालय बर्दिवासका अनुसार, प्रहरीको मध्यस्थतामा भएको छलफलपछि आइतवार दिउँसो ४ बजे राजमार्ग पुनः सञ्चालनमा आएको हो। प्रारम्भिक वार्तापछि पीडित पक्ष र बस व्यवसायीबीच सोमबार बिहान ११ बजे त्रिपक्षीय बैठक बस्ने सहमति भएपछि यातायात आवागमन सुचारु गरिएको प्रहरीले जनाएको छ।
प्रहरीका अनुसार सोमबार हुने उक्त बैठकमा बस साउ, बस व्यवसायी संघ र पीडित परिवारबीच लिखित सहमति गरिनेछ। आइतवारको छलफलमा बर्दिवास नगरपालिका-१० का वडा अध्यक्ष प्रमोद कुमार मोक्तान, वडा नं. ११ का अध्यक्ष पूर्णबहादुर बल, ईश्वरपुर नगरपालिका-१२ का वडा अध्यक्ष देवबहादुर खत्री, पीडित परिवार र स्थानीय जनप्रतिनिधिहरू सहभागी थिए।
सहमति पश्चात् हाल पूर्व-पश्चिम राजमार्ग हुँदै बीपी राजमार्गमार्ग भएर काठमाडौं तथा अन्य गन्तव्यतर्फ सवारीसाधनहरूको नियमित आवागमन सुरु भएको इलाका प्रहरी कार्यालय बर्दिवासले जानकारी दिएको छ।
