काठमाडौँ, असोज ३१ गते । नेकपा एमालेका नेता महेश बस्नेत र शिक्षामन्त्री महावीर पुनबिच सामाजिक सञ्जालमा तीखो बहस भएको छ।
बस्नेतले अन्तरवार्तामा केही समयअघि नयाँ मन्त्रीहरूले ‘गार्ड चाहिँदैन, क्वाटर चाहिँदैन, सेवा–सुविधा र गाडी नलिने’ भन्दै देखावटी कुरा गरेको तर उनीहरूको सुविधा कहाँबाट आएको भन्दै प्रश्न उठाएका थिए।
उक्त भिडियो सेयर गर्दै मन्त्री पुनले बस्नेतलाई कडा जवाफ फर्काएका छन्। उनले लेखेका छन्, ‘महेश भाइ, मलाई क्वाटर चाहिँदैन, गार्ड चाहिँदैन भन्ने मै हुँ। म केशर शमशेरको दरबारमा बसेको छु, जहाँ मन्त्रालय छ। धेरै चुरीफुरी र घमण्ड नगर। मेरो घर र गार्ड कहाँ छ, देखाउ।’
उनले अगाडि भनेका छन्, ‘तथ्य नबुझी हावा कुरा नगर। म कस्तो मान्छे हुँ, तिमीलाई थाहा नभए जस्तो नगर। हामी तीन–चार पटक भेटेर कुरा पनि गरेका थियौँ। तिम्रो फोन नम्बर अझै मसँग छ। खाल्डोमा जाने काम नगर। तिमी अझै धेरै वर्ष बाँच्ने उमेरमा छौ।’
