अरुणकुमार साह
धनुषा — धनुषाको बटेश्वर गाउँपालिका–४ स्थित बटेश्वर बजारमा बटेश्वर युवा सञ्जालको आयोजनामा रगत परीक्षण, रगतदान तथा गाउँबारे मन्थन कार्यक्रम सम्पन्न भएको छ ।

सरोज कुमार महतो संयोजक रहेको बटेश्वर युवा सञ्जाल विगत सात वर्षदेखि निरन्तर रुपमा सामाजिक र शैक्षिक चेतना अभिवृद्धिका कार्यक्रम गर्दै आएको र यस वर्ष पनि तिहार पर्वको अवसरमा गाउँ फर्किएका युवाहरु, विदेश र सरकारी सेवामा कार्यरत व्यक्तिहरुलाई एक ठाउँमा जुटाउँदै सामूहिक संवाद तथा रक्तदान कार्यक्रम सम्पन्न गरेको हो ।

तीनवटा संसकरणमा गाउँपालिकामा लोकसेवामा वटेश्वरका युवाका अवसर, चुनौती र सम्भावना, कृषिको अवस्था, शिक्षाको अवस्थाको बारेमा सामूहिक छलफल भएको थियो ।

पहिलो संस्करणमा लोकसेवामा वटेश्वरका युवाका अवसर, चुनौती र सम्भावना विषयमा सहजकर्ताको रूपमा शिक्षक दीपेन्द्र सिंहले संचालन गरेका थिए । जसमा वक्ताको रुपमा नेपाल सरकारका सहसचिव रामप्रकाश महतो, अधिकृत यमन सुन्दर श्रेष्ठ र खरिदार सुरेश साह रहेका थिए ।

दोस्रो संस्करणमा बटेश्वरको शिक्षाको अवस्था र चुनौती विषयमा केन्द्रित छलफल सहजकर्ता हरिनारायण दासले संचालन गरेका थिए । जसमा वक्ताहरुको रुपमा जनता मावि गौरीडाडाका प्रधानाध्यापक रामसकल महतो, बटेश्वर गाउँपालिकाका शिक्षा अधिकृत राम लाल महतो, समाजसेवी प्रकाश निरौला, देवकी नमुना विद्यालयकी प्रअ लक्ष्मी महतो सहभागी थिइन् ।

तेस्रो संस्करणमा वटेश्वरमा किसानको चुनौती, अवसर र आर्थिक सम्भाना सहजकर्ता उदय ठाकुर (कृषि इञ्जिनियर )ले संचालन गरेका थिए । जसमा वक्ताहरुको रुपमा वडा नम्बर ५ का वडाध्यक्ष समेत रहेका माछापालक कृषक शिव करण यादव, रेखा कुमारी महतो (कृषक तथा महिला नेतृ), गणेश साह (कृषि फर्म सञ्चालक तथा समाजसेवी) , सत्रुधन महतो (कृषि विद्यार्थी), थिए ।

उक्त कार्यकममा रगतको महत्त्व बुझ्दै रगतको अभावमा झेल्नु परेको व्यक्ति रगतको रगत दान गर्नु भयो । रगत दान गर्नेको संख्या ४८ र रगत समुह परीक्षण गर्नेको संख्या ७५ थियो ।

उक्त कार्यक्रममा पत्रकार शैलेन्द्र महतो क्रान्ति, सञ्चारकर्मी एवं मगही भाषा अभियानी फुलगेन मगही, युवा राजनीतिकर्मी अजय कुमार राउत लगायतले समग्र बटेश्वरको समसमायिक विषयमाथि प्रकाश पार्दै मन्तव्य राखेका थिए ।

स्थानीय समेत रहेका पत्रकार शैलेन्द्र महतो क्रान्तिले गाउँपालिका कार्यालयको दुई कार्यकालको समिक्षात्मक धारणा राखेका थिए । यस्तै फुलगेन मगहीले गाउँपालिकामा संस्कृतिको अवस्थाका बारे, युवा नेता अजय कुमार राउतले बटेश्वरको विकासको अवस्थाबारेमा आफ्ना धारणा राखेका थिए ।

कार्यक्रमको संचालन युवा संजालका प्रतिनिधि जयकृष्ण महतोले गरेका थिए ।