हरिवन नगरपालिका–११, सर्लाहीस्थित सनराइज ईंग्लिश बोअर्दिङ स्कुल द्वारा आयोजना गरिएको सनराइज आइडल सिजन १ उत्साह, उमंग र अद्भुत विद्यार्थी प्रतिभासहित सफलतापूर्वक सम्पन्न भएको छ। कक्षा ४ देखि १० सम्मका ६० जना विद्यार्थीहरूले प्रतिस्पर्धामा सहभागीता जनाएका थिए, जसबाट उत्कृष्ट १० जना प्रतिभाहरू छनोट भएर अन्तिम चरणमा प्रवेश गरेका थिए। विद्यार्थीहरूको समर्पण, मेहनत र संगीतप्रति रहेको प्रेमले कार्यक्रमलाई झनै आकर्षक र प्रेरणादायी बनाएको थियो।

प्रतियोगितामा कडा प्रतिस्पर्धामध्ये कक्षा ५ की समस्ती अर्याल विजेता बन्न सफल भइन् भने कक्षा ९ की आकृति वैबा प्रथम रनर–अप घोषित भइन्। कार्यक्रमको उद्घोषण विद्यालयकी शिक्षिका मधु कटवालले गर्नुभएको थियो। निर्णायक मण्डलमा तेज नारायण आले र अयुब भट्टराईको भूमिका महत्वपूर्ण रह्यो, जसले निष्पक्ष मूल्याङ्कनमार्फत प्रतियोगितालाई सफल निष्कर्षमा पुर्‍याए।

विद्यालयका म्यानेजिङ डाइरेक्टर प्रवेश पोखरेलले सनराइज आइडल जस्ता कार्यक्रमहरूले विद्यार्थीहरूको शैक्षिक मात्र होइन, व्यक्तित्व विकास र सिर्जनात्मक क्षमतालाई उकास्न महत्वपूर्ण भूमिका खेल्ने बताउनुभयो। शिक्षक, अभिभावक तथा विद्यार्थीहरूको उत्साहपूर्ण उपस्थिति र सहयोगले कार्यक्रमलाई झनै अर्थपूर्ण बनाइदियो। सनराइज आइडल सिजन १ ले विद्यार्थीहरूको आत्मविश्वास, प्रतिभा र कलात्मक यात्रामा नयाँ ऊर्जा थपिदिएको विद्यालयले विश्वास व्यक्त गरेको छ।