धनुषा जिल्लाका युवा अरुण शाह भन्नुहुन्छ—“झापा क्षेत्र नम्बर ५ को चुनाव परिणामले देशकै राजनीतिक दिशाबारे संकेत दिन सक्छ, के यो लघु जनमतसंग्रह त होइन ?”
देश यतिबेला चुनावी माहोलमा छ। कतै नेपाली कांग्रेस को चर्चा छ, कतै नेकपा एमाले, राष्ट्रिय स्वतन्त्र पार्टी र जनता समाजवादी पार्टी को आवाज गुन्जिरहेको छ। भदौ २३ र २४ गते भएको ‘जेन–जी आन्दोलन’पछि देशको राजनीतिमा उल्लेखनीय हलचल देखिएको छ।
भदौ २७ गते अन्तरिम सरकार गठन भई सुशील कार्की पहिलो महिला प्रधानमन्त्रीको रूपमा नियुक्त हुनुभयो। संविधानको धारा ७६(७) र धारा ८५(१) अनुसार प्रधानमन्त्रीको सिफारिसमा प्रतिनिधिसभा विघटन गरी नयाँ निर्वाचन घोषणा गर्न सकिने व्यवस्था छ। सोही प्रावधानअनुसार आगामी फागुन २१ गते प्रतिनिधिसभा निर्वाचन हुने तय भएको छ। अन्तरिम सरकारको मुख्य जिम्मेवारी निर्वाचन सम्पन्न गरी नयाँ सरकार गठनको मार्ग प्रशस्त गर्नु हो।
यसैबीच, माघ ४ गते बालेन्द्र साह (बालेन साह) ले काठमाडौँ महानगरपालिका को मेयर पदबाट राजीनामा दिई सोही दिन राष्ट्रिय स्वतन्त्र पार्टी मा वरिष्ठ नेताको रूपमा प्रवेश गर्नुभयो। माघ ५ गते मधेश प्रदेशको राजधानी जनकपुर मा आयोजित ‘परिवर्तन उद्घोष सभा’मा उहाँले पहिलोपटक औपचारिक राजनीतिक सम्बोधन गर्नुभयो।
बालेन साहले आफ्नो उम्मेदवारी झापा क्षेत्र नं. ५ बाट घोषणा गर्नुभएको छ। सो क्षेत्र केपी शर्मा ओली को गृहजिल्ला समेत हो, जहाँ उहाँ निरन्तर विजयी हुँदै आउनुभएको छ। २०७९ सालको प्रतिनिधिसभा निर्वाचनमा ओलीले ५२,३१९ मत प्राप्त गरी विजय हासिल गर्नुभएको थियो भने रास्वपाका उम्मेदवार तेस्रो स्थानमा रहेका थिए।
मनोनयन दर्ताको दिन झापा–५ मा बालेन साहका समर्थकहरूको उल्लेखनीय भीड देखिएको थियो। यस प्रतिस्पर्धालाई धेरैले पुराना र नयाँ राजनीतिक धारबीचको सीधा भिडन्तका रूपमा हेरिरहेका छन्। त्यसैले पनि झापा–५ को नतिजालाई धेरैले ‘लघु जनमतसंग्रह’को रूपमा व्याख्या गरिरहेका छन्।
उता, रास्वपाका सभापति रवि लामिछाने मनोनयनकै दिन पेशीका लागि पर्सा जिल्ला अदालत पुग्नुभएको थियो। अदालतले एक करोड रुपैयाँ धरौटीमा रिहा गर्ने आदेश दिएको थियो।
अब सबैको नजर झापा–५ मा केन्द्रित छ। के त्यहाँबाट नयाँ राजनीतिक सन्देश प्रवाह हुनेछ, वा पुरानै शक्ति सन्तुलन कायम रहनेछ ? अन्ततः निर्णय जनताकै हातमा छ। आगामी निर्वाचनले देशको राजनीतिक यात्रामा नयाँ मोड ल्याउने संकेत देखिएको छ।