प्रवीण कुमार शर्मा
रौतहट, चैत २० गते ।
रौतहट सदरमुकाम गौरबाट शुक्रबार पाँच जना बिचौलिया पक्राउ परेको छ ।
गौरमा रहेको भूमिसुधार तथा मालपोत कार्यालयबाट चार जना र गौर बसपार्कबाट एक जना बिचौलिया पक्राउ परेको जिल्ला प्रहरी कार्यालय रौतहटले जनाएको छ । सेवाग्राहीलाई अनावश्यक रूपमा हैरान पारेर ठगी कार्यमा संलग्न पाँचै जनालाई रौतहट प्रहरीले नियन्त्रणमा लिएको जिल्ला प्रहरी कार्यालय रौतहटका प्रहरी निरीक्षक जीवन मैनालीले जानकारी दिए ।
पक्राउ पर्नेमा यमुनामाइ गाउँपालिका वडा २ का २८ वर्षीय सिकित नारायण, राजदेवी नगरपालिका वडा ७ का २४ वर्षीय बब्लु प्रसाद यादव, सोहि ठाउँका ३० वर्षीय श्याम बिहारी यादव, परोहा नगरपालिका वडा ७ का ३९ वर्षीय रामनरेश प्रसाद पटेल र गौर नगरपालिका वडा ८ का ६० वर्षीय राजेन्द्र राउत बरै रहेको जिल्ला प्रहरी कार्यालय रौतहटका प्रहरी निरीक्षक मैनालीले जानकारी दिए ।
मालपोत कार्यालय, जिल्ला अदालत लगायत अन्य सरकारी कार्यालयमा सेवाग्राहीलाई काम छिटो छरितो गराई दिने भन्दै सेवाग्राहीका कागजात बोकी विभिन्न फाँटहरुमा जाने र सो वापत अनुचित लाभ लिने लगायतका कार्यमा संलग्न रहेको आरोपमा प्रहरीले उनीहरुलाई पक्राउ गरेको हो ।
लामो समयदेखि मालपोत कार्यालय लगायत बढि भिडभाड हुने कार्यालयमा बिचौलियाहरुले सर्वसाधारणलाई दुःख दिँदै आएको भएता पनि प्रहरी सक्रिय हुन् नसक्दा जनताले हैरानी खेप्नुको साथै आर्थिक रुपमा पिडित हुदै आएको थियो । वर्तमान सरकार सुशासन कायमसँगै जनताको हरेक पिडालाइ बुझ्दै समाधान गर्ने तर्फ उन्मुख भएको कारण प्रहरीले सक्रियता बढाएको गौर –४ का स्थानिय देवसरण पण्डितले बताए।
पक्राउ परेका पाँचै जनालाई जिल्ला प्रहरी कार्यालय रौतहटमा राखेर आवश्यक अनुसन्धान भइरहेको छ । यस्ता गतिविधिमा संलग्नमाथि कडा कारबाहीको माग समेत उठेको छ ।
