महोत्तरी: महोत्तरी जिल्लाको जलेश्वर नगरपालिका–६, बडका धबौलीस्थित रातो नदीमा एक अज्ञात पुरुषको शव लावारिस (बेवारिसे) अवस्थामा फेला परेको छ।
प्रहरीको प्रारम्भिक जानकारीअनुसार, फेला परेको शव अन्दाजी ३५ देखि ४० वर्ष उमेर समूहका पुरुषको रहेको अनुमान गरिएको छ। नदीमा शव देखेपछि स्थानीयले प्रहरीलाई खबर गरेका थिए।
घटनाको जानकारी प्राप्त हुनासाथ जिल्ला प्रहरी कार्यालय महोत्तरीबाट खटिएको प्रहरी टोली घटनास्थलमा पुगेर मुचुल्का उठाउनेलगायतका आवश्यक कानुनी प्रक्रिया पूरा गरेको छ। हालसम्म मृतकको पहिचान खुल्न सकेको छैन।
मृत्युको कारण पत्ता लगाउन प्रहरीले शवलाई पोस्टमार्टमका लागि प्रादेशिक अस्पताल, जलेश्वर पठाएको छ। मृतकको पहिचान खुलाउन र घटना कसरी हुन पुग्यो भन्ने विषयमा थप अनुसन्धान तीव्र रूपमा भइरहेको जिल्ला प्रहरी कार्यालय महोत्तरीले जनाएको छ।

