जनकपुरधाम- सडकमा रोक्न खोज्दा भागेपछि प्रहरीले गोली हानेर नियन्त्रणमा ल्यायो, २०० ग्राम ब्राउन सुगर बरामद

धनुषामा प्रहरीले गोली प्रहार गर्दै एक लागूऔषध कारोबारीलाई पक्राउ गरेको छ। मिथिला नगरपालिका–६ ढल्केवरका ४८ वर्षीय पप्पु साहलाई बुधबार साँझ करिब ५ बजे मिथिला नगरपालिका–२ नक्टाझिजस्थित जनकपुर–ढल्केवर सडकखण्डमा नियन्त्रणमा लिन खोज्दा उनी भाग्ने प्रयास गरेका थिए।

प्रहरीका अनुसार रोक्ने आदेश अवज्ञा गरी भागेपछि बेरेटा सानो पेस्तोलबाट एक राउण्ड हवाई फायर र अर्को राउण्ड गोली प्रहार गर्दा साहको दाहिने खुट्टामा लागेको हो। घाइते साहलाई उपचारका लागि जानकी मेडिकल कलेज रमदैयामा भर्ना गरिएको धनुषाका प्रहरी प्रवक्ता डिएसपी बरुणबहादुर सिंहले जानकारी दिए।

उनको साथबाट २०० ग्राम ब्राउन सुगर बरामद गरिएको छ। मोटरसाइकलमा पछाडि सवार हंसपुर नगरपालिका–५ निकालकी ३० वर्षीया सेलो देवी रामलाई समेत प्रहरीले पक्राउ गरेको छ।

यो कारबाही काठमाडौंबाट खटिएका प्र.नि. राकेश यादव र महेन्द्रनगर, धनुषाबाट खटिएका प्र.नि. राजाराम यादवको संयुक्त टोलीले गरेको हो।