हरिवन, सर्लाही । विश्व वातावरण दिवस २०२६ को अवसरमा हरिवन नगरपालिकामा सञ्चालित समृद्धिका लागि वन परियोजना र हाम्रो शहर परियोजनाको आयोजनामा नगरस्तरीय चित्रकला प्रतियोगिता सम्पन्न भएको छ। कार्यक्रम वन तथा वातावरण शाखा, हरिवन नगरपालिका तथा बागमती सेवा समाजको संयुक्त आयोजनामा श्री महादेव जनता माध्यमिक विद्यालयको सभाहलमा सम्पन्न भएको हो।

प्रतियोगितामा नगरभित्रका १६ वटा विद्यालयका विद्यार्थीहरूको उत्साहजनक सहभागिता रहेको थियो। वन संरक्षण, हरित मार्ग, विपद व्यवस्थापन, इको पार्क, वृक्षारोपण, हरित शहर, वातावरण संरक्षण, हरित विकास तथा दिगो भविष्यसम्बन्धी विषयवस्तुमा आधारित चित्रहरू प्रस्तुत गर्दै विद्यार्थीहरूले आफ्नो सिर्जनात्मक क्षमता प्रदर्शन गरेका थिए।

कार्यक्रमका प्रमुख अतिथि हरिवन नगरपालिकाका प्रमुख प्रशासकीय अधिकृत हेमराज फुयाल तथा विशिष्ट अतिथि शिक्षा शाखाका उपसचिव हरि प्रसाद दाहाल रहनुभएको थियो। कार्यक्रमको सञ्चालन सुवास कुश्वाहाले गर्नुभएको थियो भने समापन श्री महादेव जनता माध्यमिक विद्यालयका प्रधानाध्यापक गिरिराज रानाले गर्नुभएको थियो।

प्रतियोगिताको मूल्यांकन समितिमा श्री चुडामणि वाग्ले, रुस स्टालिन चौलागाईं तथा विमल जोशी रहनुभएको थियो।

प्रतियोगिताको नतिजाअनुसार:

– प्रथम: महादेव जनता माध्यमिक विद्यालय
– दोस्रो: चतुर्भुजेश्वर जनता माध्यमिक विद्यालय
– तेस्रो: अर्किड विद्यालय
– सान्त्वना: सनराइज विद्यालय र एन्जल एकेडेमी

कार्यक्रममा वातावरण संरक्षणप्रति विद्यार्थीहरूलाई सचेत गराउँदै सिर्जनात्मक माध्यमबाट वातावरणीय सन्देश प्रवाह गर्ने उद्देश्य रहेको आयोजकले जनाएको छ। सहभागी विद्यार्थीहरूले वातावरणीय संरक्षण र दिगो विकासका विषयमा आफ्नो सोच र कल्पनालाई चित्रमार्फत प्रभावकारी रूपमा प्रस्तुत गरेका थिए।