सर्लाही जिल्ला हरिवन नगरपालिका वार्ड नं ११ स्थित सनराइज इङ्लिस बोर्डिङ स्कुलमा महिलाहरूको महान पर्व हरितालिका तीजका अवसरमा महिला शिक्षिकाहरूबीच शुभकामना आदानप्रदान कार्यक्रम सम्पन्न भएको छ। कार्यक्रममा विद्यालयमा कार्यरत महिला शिक्षिकाहरूले शुभकामना साटासाटसँगै दर खाने परम्परागत कार्यक्रमलाई पनि भव्य रूपमा सम्पन्न गरेका थिए। साथै विद्यालयको तर्फबाट शिक्षिकाहरूलाई सिंगारका सामग्रीहरू वितरण गरिएको थियो।

कार्यक्रम विद्यार्थीहरूको पठनपाठनमा असर नपुग्ने गरी आयोजना गरिएको थियो। यस अवसरमा सहभागी शिक्षिकाहरूले तीज पर्वलाई धार्मिक संस्कार र सांस्कृतिक पहिचानलाई जगेर्ना गर्ने माध्यमका रूपमा मनाउनुपर्नेमा जोड दिएका थिए। साथै समाजमा विद्यमान विकृति र विसंगतिहरुमा रोक लगाउँदै संस्कृतिप्रति सजग बन्नुपर्ने सन्देश पनि दिइएको थियो।

विद्यालयका प्रबन्ध निर्देशक प्रबेश पोखरेलले पठनपाठनसँगै संस्कृति र संस्कारलाई संरक्षण गर्दै लोकपरम्परा जोगाउन यस्ता कार्यक्रमहरूको आवश्यकता रहेको बताउनुभयो। उहाँका अनुसार, विद्यालयले शैक्षिक गतिविधिसँगै सामाजिक र सांस्कृतिक कार्यक्रमलाई निरन्तरता दिँदै आएको छ, जसले विद्यार्थी र समुदायलाई दुवैलाई सकारात्मक प्रभाव पुर्‍याइरहेको छ।