बिबेक कुमार महतो,
महोत्तरी | महोत्तरीको गौशाला नगरपालिकाका नगर प्रमुख डा. दिपेन्द्र महतोले दीपावलीको पावन अवसरमा सम्पूर्ण नगरवासी, देश तथा विदेशमा रहेका नेपालीहरूलाई शुभकामना दिँदै पर्वलाई सुरक्षित र जिम्मेवार ढंगले मनाउन आग्रह गर्नुभएको छ।

उहाँले दीपावलीका बेला पटाका पड्काउँदा, दियो वा मैनबत्ती बाल्दा तथा झिलिमिली बत्ती जडान गर्दा विशेष सतर्कता अपनाउन अनुरोध गर्नुभयो। “हरेक वर्ष दीपावलीको समयमा कतै न कतै दुर्घटना हुने गरेको पाइन्छ, त्यसैले पटाका पड्काउँदा सुरक्षित दूरीमा रहनुहोस् र बालबालिकालाई निगरानीमा राख्नुहोस्,” उहाँले भन्नुभयो।

नगर प्रमुख महतोले आगो लाग्ने सम्भावना हुने पर्दा वा कपडाको नजिक दियो वा मैनबत्ती नराख्न र विद्युतीय झिलिमिली बत्ती जडान गर्दा पनि सावधानी अपनाउन नगरवासीलाई आग्रह गर्नुभएको छ। उहाँका अनुसार, लापरवाहीका कारण बालबालिका र घरपरिवारलाई क्षति पुग्ने घटना विगतमा देखिएको छ, त्यसैले यस वर्ष सतर्कता आवश्यक छ।

यदि कुनै दुर्घटना वा आकस्मिक अवस्था सिर्जना भएमा तुरुन्तै गौशाला नगर प्रहरी प्रमुख टेकबहादुर लामा ९८५४०३४६१५ वा वारुण यन्त्र इन्चार्ज रामपुकार महतो ९८६४०८४३६७ तथा वारुण यन्त्र चालक ९८४४३३०३३१ लाई सम्पर्क गर्न सकिने जनाइएको छ।
नगर प्रमुख महतोले अन्त्यमा सबै नगरवासीलाई “सुरक्षित, उज्यालो र हर्षोल्लासपूर्ण दीपावलीका लागि हार्दिक शुभकामना” व्यक्त गर्नुभएको छ।