रौतहट, साउन २० – “हुने बिरुवाको चिल्लो पात” भनेझैं, रौतहट जिल्लाको कटहरिया नगरपालिका–२, जमुनियाका युवा रिजवान बढ्ई आज राष्ट्रिय तथा अन्तर्राष्ट्रिय तहमा छुट्टै पहिचान बनाउन सफल भएका छन्। बाल्यकालदेखि नै बाल क्लबको यात्राबाट सुरु भएको उनको सामाजिक अभियान अहिले गैरनाफामूलक संस्था तथा राष्ट्रिय युवा कार्यक्रमहरूसम्म फैलिएको छ।

हाल उनी नेपाल युवा नेतृत्व विकास केन्द्रका अध्यक्ष तथा नमस्ते नेपालका मधेश प्रदेश संयोजकका रूपमा क्रियाशील छन्। विगत ७ वर्षदेखि स्थानीय तहमा युवासँग प्रत्यक्ष काम गर्दै आएका बढ्ईले विभिन्न संघसंस्थासँग सहकार्य गर्दै सामाजिक रूपान्तरणका परियोजनाहरूमा उल्लेखनीय योगदान पुर्‍याएका छन्।

नेपाल युवा नेतृत्व विकास केन्द्र मार्फत उनले युवा नेतृत्व, सशक्तिकरण, वकालत, लैङ्गिक हिंसा, बालविवाह, दाइजो प्रथा र महिला हिंसाको अन्त्यका लागि विभिन्न कार्यक्रम सञ्चालन गर्दै आएका छन्। युवालाई नेतृत्वदायी भूमिका निर्वाह गर्न तालिम प्रदान गर्दै, उनले समाजमा सकारात्मक परिवर्तन ल्याउने प्रेरणा जगाएका छन्।

त्यही प्रेरणाले उनले हालै नेपाल सरकारको युवा तथा खेलकुद मन्त्रालय अन्तर्गत राष्ट्रिय युवा परिषद्द्वारा आयोजित “संघीय नमुना युवा सांसद अभ्यास–२०८२” मा रौतहट प्रतिनिधित्व गर्दै सहभागी भए। कार्यक्रममा उनी प्रतिपक्ष दलका प्रमुख नेताका रूपमा चयन भइ शिक्षा, स्वास्थ्य, कृषि, र रोजगारीका विषयमा धारिलो मन्तव्य दिएका थिए।

बढ्ईले मन्तव्यमा भनेका थिए, “मधेश प्रदेशका माध्यमिक विद्यालयहरूमा ९० विद्यार्थीको तुलनामा १ शिक्षक छन् भने आधारभूत तहमा ६४ विद्यार्थीमा १ शिक्षकले पठनपाठन गराउनुपरेको अवस्था छ। यस्तै अन्य प्रदेशमा २८ विद्यार्थीमा १ शिक्षकको दरबन्दी छ। यस्तो शिक्षामा असमानता कहिलेसम्म?”

स्वास्थ्य सेवाबारे उनले चिन्ता व्यक्त गर्दै भने, “मधेश प्रदेशका धेरै स्वास्थ्य चौकीहरूमा जीवनजल र पारासिटामोल बाहेक औषधि पाउन गाह्रो छ। तर सरकारले ९८ प्रकारका औषधि निःशुल्क दिएको घोषणा गर्छ। त्यो कहाँ पुगेको हो?”

रोजगारीको सन्दर्भमा पनि उनले तथ्य प्रस्तुत गरे, “२०७९ सालदेखि ११ लाखभन्दा बढी युवा वैदेशिक रोजगारीमा गएका छन्। सरकारले स्वदेशमै रोजगारी दिने बताउँछ, तर त्यो कहाँ छ?”

समाजमा सुधार ल्याउन, युवालाई सचेत, सक्षम र नेतृत्वदायी बनाउने उद्देश्यले काम गरिरहेका रिजवान बढ्ई जस्ता युवाहरू देशको लागि आशाको किरण हुन्। उनीजस्ता प्रतिबद्ध, साहसी र क्रियाशील युवाले नै समाजलाई उज्यालो दिशामा लैजान सक्ने विश्वास नागरिकहरूमा बढ्दै गएको छ।