काठमाण्डौ- सूचना तथा प्रसारण विभागले अनलाइन सञ्चारमाध्यम (अनलाइन पत्रिका) दर्ता र नवीकरण कार्य अस्थायी रूपमा स्थगित गरेको छ। विभागका अनुसार यो प्रक्रिया नयाँ कानुनी व्यवस्थासँग मिलाउनका लागि रोकिनु परेको हो।

छापाखाना तथा प्रकाशन सम्बन्धी ऐन २०४८ मा गरिएको संशोधनअनुसार अब अनलाइन सञ्चारमाध्यम दर्ता र नवीकरणको जिम्मा जिल्ला प्रशासन कार्यालय (सीडीओ) मार्फत हुने व्यवस्था गरिएको छ।

यसअघि विभागले अनलाइन सञ्चारमाध्यम सञ्चालन निर्देशिका २०७३ बमोजिम दर्ता र नवीकरण गर्दै आएको थियो। अब पत्रपत्रिकासरह अनलाइन पनि जिल्ला–जिल्लामै सीडीओमार्फत दर्ता र नवीकरण हुने व्यवस्था हुनेछ।