रौतहट– रौतहटको देवाहीगोनाही नगरपालिका–९ धरहरीटोलस्थित कृष्ण मन्दिरमा शनिबार भएको श्रीकृष्ण जन्माष्टमी मेलाको उद्घाटनलाई लिएर दुई पक्षबीच झडप हुँदा नगरप्रमुख प्रेमलाल साह कानुसहित पाँच जना घाइते भएका छन् ।
इलाका प्रहरी कार्यालय गरुडाका डीएसपी राजन कार्कीका अनुसार घाइते नगरप्रमुख कानुको टाउकोमा १७ वटा टाँका लगाइएको छ । प्रहरी हबलदार जगदीशराय यादवको टाउकोमा ५ वटा र हबलदार धनसुन्दर ठाकुरको टाउकोमा ४ वटा टाँका लगाइएको छ । अन्य घाइतेहरूको गरुडास्थित बेटर नेपाल अस्पतालमा उपचार भइरहेको छ ।
झडपमा देवाहीगोनाही–९ का रामविकाश साह र श्यामविनय साह पनि घाइते भएका छन्।
घटनामा संलग्न रहेको आरोपमा प्रहरीले देवाहीगोनाही–९ का राधामोहन साह , विनोद साह र रीतिक साह लाई पक्राउ गरेको छ ।
नगरप्रमुख पक्षले रिबन काटेर मेलाको औपचारिक उद्घाटन गर्नुपर्ने अडान राख्दा, अर्को पक्षले औपचारिकता बिना मेला सञ्चालन गर्ने अडान लिँदा विवाद उत्पन्न भई झडप भएको प्रहरीले जनाएको छ ।
कृष्ण जन्माष्टमी मेलामा झडप : मेयरसहित ५ जना घाइते, तीन जना नियन्त्रणमा
