काठमाडौँ, कार्तिक १२ गते । आज कोशी, बागमती र गण्डकी प्रदेशका उच्च पहाडी र हिमाली भूभागका केही स्थानमा मध्यम हिमपातको सम्भावना छ।
जल र मौसम विज्ञान विभागका अनुसार, कोशी र बागमती प्रदेशका उच्च पहाडी र हिमाली भूभागका एक-दुई स्थानमा भारी हिमपातको सम्भावना छ।
विभागका अनुसार उक्त अवधिमा देशको बागमती, कमला, कोशी र कन्काई नदी र ती नदीका सहायक नदीमा पानीको बहाव उल्लेख्य बढ्नेछ। ती क्षेत्रमा सतर्कता तह आसपास पुग्न सक्छ र कोशी, बागमती र मधेश प्रदेशका महाभारत, चुरे भएर बहने साना नदीमा आकस्मिक बहाव हुन सक्ने सम्भावना छ।
यस्तै बागमती प्रदेशका काठमाडौं उपत्यका, काभ्रे, सिन्धुपाल्चोक, दोलखा, मकवानपुर, चितवन र सिन्धुली, मधेश प्रदेशका बारा, पर्सा, सर्लाही, रौतहट, महोत्तरी, धनुषा, सप्तरी र कोशी प्रदेशका सङ्खुवासभा, ताप्लेजुङ, पाँचथर, तेहथुम, भोजपुर, धनकुटा, इलाम, झापा, मोरङ, सुनसरी जिल्ला भएर बहने साना नदीमा आकस्मिक बहावको सम्भावना उच्च छ।
सम्भावित वर्षा र हिमपातले नदीमा आकस्मिक बहाव, पहिरोलगायतका जोखिमका साथै दैनिक जनजीवन, सडक र हवाई यातायात, कृषि, पर्यटनलगायत क्षेत्रमा प्रभाव पर्न सक्छ।
बंगालको खाडीमा विकसित चक्रवात ‘मोन्था’ भारतको आन्द्र प्रदेशमा प्रवेश गर्ने क्रममा छ। यसपछि चक्रवातको प्रभाव बिस्तारै कमजोर हुँदै उत्तर-उत्तर पश्चिम दिशामा सर्दै न्यूनचापीय क्षेत्रका रूपमा नेपालको मध्य भूभाग नजिक आएर पूर्वतर्फ सर्नेछ।
