हरिवन नगरपालिकाको आयोजनामा आज अप्रिल १५ का दिन अन्तर्राष्ट्रिय आरोग्य दिवसको अवसरमा हरिवन सगुन सहकारी अगाडि योग कार्यक्रम सम्पन्न गरिएको छ। “आरोग्य बन्ने अभियान” अन्तर्गत बिहानको समयमा आयोजना गरिएको उक्त कार्यक्रममा नगरका जनप्रतिनिधि, कर्मचारी, स्वास्थ्यकर्मी तथा आम नागरिकहरूको उल्लेखनीय सहभागिता रहेको थियो।

कार्यक्रममा स्वास्थ्यकर्मी श्याम बिनोद कुशवाहाले योगको महत्वबारे जानकारी गराउँदै नियमित योग अभ्यासले शरीरलाई रोगसँग लड्ने क्षमता वृद्धि गर्नुका साथै शारीरिक तथा मानसिक ऊर्जा प्रदान गर्ने बताउनुभयो। उहाँले स्वस्थ जीवनशैलीका लागि दैनिक जीवनमा योगलाई समावेश गर्न आग्रह गर्नुभयो।

त्यसैगरी, हरिवन नगरपालिकाका मेयर कमल बुढाथोकीले “सबै स्वस्थ बन्ने अभियानमा सहभागी बनौं, हरिवनलाई स्वस्थ बनाऔं” भन्ने सन्देश दिनुभयो। उहाँले यस्ता कार्यक्रमहरूले नागरिकमा स्वास्थ्यप्रति जागरूकता बढाउने विश्वास व्यक्त गर्दै आगामी दिनमा पनि यस्ता अभियानलाई निरन्तरता दिने जानकारी गराउनुभयो।